ఆ సర్వేతో నాకు సంబంధం లేదు.. తేల్చి చెప్పిన లగడపాటి!

గత రెండు మూడు రోజులుగా తెలంగాణ ముందస్తు ఎన్నికలపై 'లగడపాటి సర్వే' అంటూ సోషల్ మీడియాను ఓ సర్వే వివరాలు చుట్టేస్తున్నాయి. లగడపాటి సర్వే అంటే అది కచ్చితంగా జరిగి తీరుతుందని, వచ్చే ఎన్నికల్లో ఇదే జరగబోతోందంటూ ప్రచారం జరుగుతోంది. ఈ సర్వే ఓ పార్టీకి అనుకూలంగా ఉండడంతో ఆ పార్టీ అభిమానులు, కార్యకర్తలు దానిని షేర్ల మీద షేర్లు చేస్తూ వైరల్ చేశారు. తాజాగా, ఈ సర్వేపై టీఆర్ఎస్ నేత ఒకరు స్పందించారు. లగడపాటి రాజగోపాల్ సర్వే ఆంధ్రాలోనే తప్ప తెలంగాణలో పనికిరాదని తేల్చి చెప్పారు.

తన సర్వే పేరిట జరుగుతున్న ప్రచారంపై లగడపాటి రాజగోపాల్ స్పందించారు. ఆ సర్వే తనది కాదని, దానితో తనకు ఎటువంటి సంబంధం లేదని తేల్చి చెప్పారు. శుక్రవారం ఆయన ఓ చానల్‌తో మాట్లాడుతూ... సోషల్ మీడియాలో జరుగుతున్నదంతా తప్పుడు ప్రచారమన్నారు. ఆ సర్వే ఫలితాలకు, తనకు ఏమాత్రం సంబంధం లేదన్నారు. ఎన్నికల షెడ్యూలు విడుదలై, నామినేషన్ల ప్రక్రియ పూర్తయిన తర్వాతే సర్వే చేసి ఫలితాలను వెల్లడిస్తానని ఆయన వివరించారు. అప్పటి వరకు తన పేరిట ఏం జరిగినా నమ్మవద్దని సూచించారు.